THE AULD BRAE WELL
| ||
| ||
We a' hae fond remembrances That stir the heart for aye And O! what memories gather round The wee well on the brae. The loved, the lost, the wandered far We still can feel their spell As they played as bonny bairnies Roon the Auld Brae Well.
The trees that rustle ower our heids The Auld Kirk on the Knowe The rowin' river king o' a' The rivers that may row. Wi' music and wi'melodie In Nature's voices tell O' the frien's that played as bairnies Roond the Auld Brae Well.
They've wandered monie a weary road They've sailed ower monie a sea An' followed round the rowin' earth The footsteps o' the free. They've crossed the wide Atlantic's wave An' the Pacific's swell Wha' hae played as bairnies Roond the Auld Brae Well.
But aye whaure'er they bare their broos An' swell their hymn o' praise Their beatin' hearts are ever here 'Mang Stanley's bonnie braes. An' a' the winds frae oot the West Sweet messages can tell O' the frien's that played as bairnies Roond the Auld Brae Well.
An' see them lift their buirdly breasts Upon the battle plain When shot an' shell flew thick and fast An' bluid fell like the rain. Among the best an' bravest there They bauldly fightin' fell Wha' hae played as bonny bairnies Roond the Auld Brae Well.
Their hearts were ever staunch an' true Their hearts were ever leal To foes they were as dour as death To frien's as true as steel. An' dauntless ever were they a' Whatever ills befell Wha' hae played as bonny bairnies Roond the Auld Brae Well.
An' they wha' ne'er gaed frae hame Oor dearest an' oor best Oor faithers an' oor mithers a' Hae' wandered to their rest. They lie in bonnie Auchterga'en Kinclaven or Kirkhill Wha' hae played as bonny bairnies Roond the Auld Brae Well.
While life is lingerin' in my heart An' memory in my brain I'll hear the crystal water rin Reca'in joy and pain. I'll hear the voices o' the past In tender accents, tell O the freends' wha' played as bairnies Roond the Auld Brae Well.
* * * * * * * * * * (Thanks to Kate Gairns for providing this)
| ||